Шнасыне сембе велесь — 11 июня 2026 г. в 14:07:00.545
Шнасыне сембе велесь Эряфсь аф ащи фкя вастса. Кизотне молихть. Сембе минь сиреттяма, шумбрашись лафчеми. И тейнек, сире ломаттненди, фалу эряви лезкс. Монь мялезе азомс шнамань валхт Крхтажень фельдшерско-акушерскяй пунктть колга. Тяса покодихть козя опыт мархта, сталмода аф пели ломатть. Нят Роза Павловна Резяпкина, Валентина Ивановна Гужанкова. Синь лац содасазь велеса эряйхнень, кинди кодама лезкс эряви. И кда ломанти эряви кодамовок лезкс, вестевок аф атказайхть лездомс. Улеза ве, рана шобдава, вишке пизем или кодамовок давол. Кадсазь сембе тевснон и эряскодыхть ломанти медицинскяй лезксонь максома. Сембе велеряйхне шнасазь фельдшерско-акушерскяй пунктса покодихнень. Монь эздон колмонь-крда спасиба. Курок тейне топоди 84 киза. Идькс пингозе прась Великай Отечественнай войнань кизотненди. Алязе, Матвей Иванович, ульсь войнаса, тюрсь фашисттнень каршес. Ранендафоль пяк стакаста, ашель фкя кядец. Сяка покодсь, лиянь фталу ашезь кяшенде. Трудендась колхозса тядязевок. Ветенектолеме семьяса. Ветецьке стирьхть. Лядонь ськамон. Мон касфтонь кафкса итть. Тяни лама уноктон, уноконь идьтон. Сембонь кельгсайне, сембонь учсайне инжикс. Сяс шумбрашись эряви ванфтомс. И тянкса оцю спасиба фельдшерско-акушерскяй пунктса покодихненди. Синь путыхть тейне честь, пичедихть инксон, варжамон сашендыхть пцтай эрь шиня. Любовь МУРЗАЙКИНА, Атюрьевскяй райононь Крхтаж велеста трудонь ветеран, войнань пингонь идь.