Мошенникненди ётафтсь 4,6 миллион цалковай — 3 июля 2026 г. в 12:21:01.568
Мошенникненди ётафтсь 4,6 миллион цалковай Саранск ошень полицияв пшкядсь Н.П.Огарёвонь лемса МГУ-нь довузовскяй образованиянь директорсь. Сон пачфтезе, што повсь мошенникнень килькшс и тянь сюнеда юмафтсь 4,6 миллион цалковай. Мордовиянь МВД-ть информациянц коряс, май ковста теенза гайфтсь аф содаф, кона пачфтсь посылкать пачфтеманц колга и мярьгсь азомс смс-кодть сонь получаманц инкса. Пинге ётазь телефонозонза сась «Госуслугаста» сообщения, коса тяштьфоль «горячай линиять» номероц. Гайфтемок тя номерть коряс, авати пачфтсть личнай кабинетозонза, бта сонь лемстонза тяштьф доверенность аф содаф ломань лангс, кона вешендеви. Штоба аф нолдамс тя доверенностть тевс, эрявсь полафтомс счётть реквизитонзон. Васенда авась корхнесь банковскяй сотрудник мархта, а меле бта Россиянь ФСБ-ста представитель мархта. Корхнемада меле авась кучф QR-код вельде ётафтсь мошенникненди 4 миллиотт 597 тёжянь цалковай. Шарьхкодсь эста, мзярда мошенникне тага кармасть анама кядьстонза ярмак.