Тя минь историяньке — 10 июля 2026 г. в 15:59:00.723
Тя минь историяньке ВЕЛИКАЙ ОТЕЧЕСТВЕННАЙ ВОЙНАСА ТАНКОВАЙ ИНЬ ОЦЮ ТЮРЕМАСЬ 12 июльсь—Отечествать военнай историяса мяляфтови ши. Тя шиня 1943 кизоня Прохоровкать видеса ульсь советскяй и германскяй армиятнень ёткса танковай инь оцю тюремась Омбоце Мировой войнать пингста. Танкань соединениятненди командиркс тя тюремать пингста ульсь генерал-лейтенантсь Павел Ротмистров советскяй ширде и СС-нь группенфюрерсь Пауль Хауссер немецнень ширде. Фкявок ширети ашезь удала сатомс 12 июленди арьсефть: немецненди ашезь фатяв Прохоровкась, ашезь сязев советскяй войскатнень оборонасна, а советскяй войскатненди ашезь удала сявомс противникть группировканц. КОДА МОЛЬФТЕВСЬ ТЮРЕМАСЬ Кда советскяй Центральнай фронтса 1943 кизонь 5 июльста немецненди ашезь удала сувамс войсканьконь обороназост, то Курскяй дугать южнай ширесонза тефне мольсть сяда стакаста. Тяса васенце шиня противниксь сувафтсь тюремати пцтай 700 танка и штурмовой орудия, конатнень ширеснон кирдезень авиациясь. Советскяй командованиясь сась мяльс тиемс контрудар врагонь группировкать ланга. Воронежскяй фронтсь виияфтфоль Ставкать вельде (5-це гвардейскяй танковай и 45-це гвардейскяй армиятнень и танкань кафта корпуснень мархта). 12 июльста Прохоровкать маласа ульсь Омбоце Мировой войнань инь оцю тюремась, конань эса кафцьке ширде пуромкшнесь 1200 танка и самоходнай орудия. Советскяй танкань войскатне ёрасть мольфтемс маластонь тюрема, сяс мес Т-34-ть 76 мм орудияц ляцеви 800 метрас, а лия танкатнень нинге сядовок кржас. Кафцьке ширетне Прохоровкать маласа юмафтсть пяк лама. Тюремаса советскяй войскатне юмафтсть 500 танка 800-ста. Немецне—300 танка 400-ста. Теест тя ульсь оцю зиянкс. Тяни немецнень инь вии группировкасна вийфтомоль. Генералсь Г.Гудериан, кона эста вермахтонь танкань войскань генерал-инспектороль, тяштсь: «Бронетанкань войскатне, конат кочкафтольхть-пуроптфтольхть пяк стакаста, лама ломанень и техникань юмафтомать сюнеда, лама пингс лиссть стройста... и Восточнай фронтса сетьме шит ашельхть ни». Тя шиня противниксь башка мяль шарфтсь оборонати. 13-15 июльста немецкяй войскатне мольфтезь атакаснон аньцек 5-це гвардейскяй танковай и 69-це армиятнень пяльксснон каршес Прохоровкать эзда южнай ширеса. 16 июльста немецне ушедсть потама тоза, косотольхть инголи.