Крхтажть шнамань ломанец — 10 июля 2026 г. в 15:41:01.207
Крхтажть шнамань ломанец Лятфнемань и ризнамань ши карша Атюрьевскяй райононь Крхтаж велень мокшавась, велень хозяйствань ветеранць, войнань пингонь идсь, кафкса идень тядясь Л.М.Мурзайкина отмечазе эсь 84 кизонь шачема шинц. Шиньберьф ашезь сетьмосе телефоноц. Коста аньцек ашесть гайфне ломаттне. Раднядонза пяк лама: племянникт, племянниконь итть, кудат-кудават. Да и сонценьге семьяц пяк оцю: кафкса иденза, кярькс унокоц, улихть и уноконь иденза, овонза, рьвянянза. Сяс тянь ширде инь козя ломанць Крхтаж велеса. —Оцю спасиба сембонди,—корхтай Любовь Матвеевна.—Аф аньцек шачема шистон, но и эрь шиня гайфнихть. Фкять мархта аделаса корхтамазень, омбоцесь—гайфти. Кизефнихть, кода эрян-ащан, шумбран или аф. И кда шарьхкодьсазь, што мезевок аф стане, сембе тевснон кадсазь, эстокиге ардыхть ваномон. Сембе эряфонц Л.М. Мурзайкина ётафтозе Крхтажса. Трудендама ушедсь нинге стирнякс. Работаманц кельгозе, сталмода ашезь пеле. Коса ашезь трудендакшне Люба Левановась, кулендсь эсь колганза аньцек шнамань валхт. Стирнякс каннесь велеряйхненди почта. Тоса покодсь свинаркакс, лия вастса «Рассвет» колхозса. Тясоль и мирдец, П.Ф.Мурзайкин. Сон трактористоль, колхозса и районца содаф механизатороль. Касфтсть кафкса итть. Ужяль, но Павел Фёдорович рана кулось. Куломдонза меле шачсь и кассь лама унокоц, уноконь идец, конатнень сатфксснон инкса кеняртькшни тяни Любовь Матвеевна. Сон войнань пингонь идь. Касы поколенияти сидеста азонкшни ся стака кизотнень колга. Сянь квалма, кода аляц, М.И.Леванов, тусь войнас. Тоса стакаста ранендафоль. Лядсь фкя кядьфтома. Рьвац, Евдокия Канофеевна, трудендась колхозса. Любась инь ёмласель. А нинге ниле стирьсна оцюфнень мархта ряц трудендасть колхозса. Тяни синь ашет ни шиса. Любовь Матвеевна инь сиресь и Леванофнень, и Мурзайкиттнень родстост-плямастост. Кельгома тядя, баба-щава, ака. Снимкаса: Л.М.Мурзайкина семьянц мархта.