Эряфонь кибряса — 10 июля 2026 г. в 15:24:00.243
Эряфонь кибряса «МУЙНЕ СЯНЬ, КИНЬ ВЕШЕНДЕЗЕ ВАЙМОЗЕ» Ушеса азорондай тялось. Ванан квартирань вальмава и лятфнян. Тя ульсь колмогемонь кизода инголе. Вузса тонафнемста мон васьфтень цёра. Нюрьхкяня пингта меле ётксонк крьвязсь оцю кельгома. Конашкава павазуволень, кеняртькшнезь васьфнине эрь шить. Цёратьке ашель вастса ащемац: театрав, кинос-коза тернемань. Аф шуроста культурнай мероприятиятнень эзда тейне сашендовсь атказакшнемс. Кда виденцямс, ломань ёткс лисемс ашель мезьса. Няемок, што ялгане полафнесазь щамснон-карямснон эрь шиня, кармань виздема и вешендема туфталхт, штоба лядомс куду. А цёрась ашезь шарьхкотькшне, мезьса тевсь. Весть тяфтама атказамдон меле Володя тусь ськамонза. Вов тяста сембось и ушедсь. Кода муцсень пря, мзярда содайне, што кельгомазе васьфни лия стирь мархта. Стирть лангс кяжиелень, сон корязон вельф лац щафоль-каряфоль. Каянь лангозонза сельме, мес сон, а аф мон аськолян Володять ваксса. Пингонь ётазь мирендань тянь мархта. Ялгадон ламоль: и стирнят, и цёранят. Аф кржаль стамдовок, конат старандасть маладомс тейне, сотомс мархтон кельгомань соткст. Но тейне кивок ашезь эряв. Максонь эстейне вал, кда, лисян мирденди, то эстедон эзраенди. И мувсь тяфтама. Кеветие киза ётксонк. Сергей пяк виздихнень эздоль. Пингонь ётазь рьвяяме. Арьсекшнень, што мирдезе кядьса кармай каннемон. Но арьсемане стаки лядсть арьсемакс—мялезе ашезь пяшкодев. Мирдезень курок эвондасть работас коре ялганза, да стамот, конат арасть теенза рьвадонза питникс. Куду мртцесь «лямбоняста». Кода маштонь, стане тяряфнень мрдафтомс эрьготьф мирдть семьяти, но монь мезевок ашезь лисенде. Виздень тяфтама полать мархта ульцяв лисемазень. ...Цёраняньке шачсь шумбра-таза. Шобдава, панжемок сельмонень, няендине палатас коре аватнень павазу сельмованфснон. Теест каннесть панчфт, а монь казнезе—сей-тов вельси мирдезе. ...Марса эрязь ётасть тага ниле кизот. И тя пингста мезевок ашезь полафта. Стаки кяляцянь эсь прязень эса, старандань озафтомс седиезень сянь мархта, што тяни ламотне тяфта эряйхть или нинге сядонга кальдявста. Эрь, арьсекшнень, шачфтан нинге фкя, пади, Шкайсь максы стирня и сембось ладяви. Ашезь ладяв. Кизотне мольсть, а мирдсь стаки ашезь сетьмосе. Иденьке кассть, тяни кафцьконь синцень семьясна, синцень тевсна-заботасна, а мон лядонь ськамон. Ськамон мирде ваксса, конань аф уленди фкявок кятав шиц. Аф весть ни тяряфнень сяземс пе. Мярьгондень: саты муцсемс пря. А кда виденцямс, тяни лангозонза мяльге аф шарфнян и тя сяс, мес васьфтине сянь, конань лама киза вешендезе ваймозе. Сонга тяни ошса, сонга ськамонза—аф кунара кулось рьвац. Сюцихть эсон маластонь ломанне тяфтама аськолксонь тиеманкса. Кода, кле, тяфта: эрят мирде мархта, а кельгат лия. Яфт марх- тонза и кице ули панжада. Мезе отвечамс каршезост—аф содаса. Панемс ульцяв лима-сюна мирдть аф сай седиезе, а эрямс мархтонза аф сатнихть вийне. А тя—монь павазозе, катк и васьфтине аф одонь кизоса. Светлана Богатова.