Шикәр диабеты баллы ашаганнан барлыкка киләме?
Шикәр диабеты баллы ашаганнан барлыкка киләме? Татарстанда ел саен шикәр диабетының уртача 7 меңнән артык очрагы теркәлә. Авыручылар арасында, балалар, яшьләр, өлкәннәр дә бар. Авыруның билгеләре, дәвалану хакында Марат Садыйков исемендәге 7нче Казан шәһәре хастаханәсенең 1нче сырхауханәсендә табиб-эндокринолог Рәзилә Хәмидуллина белән сөйләштек. -Шикәр диабеты баллы ашаганнан гына барлыкка килмидер? -Шикәр диабеты баллы ашаудан гына барлыкка килми анысы. Дөрес, диабетлы кешеләрнең татлы ризыкларны чамасыз кулланганда хәле начарланырга мөмкин. Авыруның барлыкка килү сәбәпләре чирнең тибына бәйле. I тип шикәр чире нәселдән күчә ала. Әйтик, әти-әнисе диабет белән авырый икән, баласында ул чирнең барлыкка килү ихтималы зур. Шулай ук геннар зарарлану да йогынты ясый, төрле вируслар да бу тип шикәр диабетына китерергә мөмкин. II типның барлыкка килү сәбәпләре: артык гәүдә авырлыгы, дөрес тукланмау, аз хәрәкәтләнү, углеводларны күп куллану, даими стресс, матдәләр алмашы бозылу һәм нәселдәнлек. –Шикәр диабеты вакытында ничек тукланырга? – Шикәр диабеты вакытында диета — дәвалауның иң мөһим өлеше. Авыруларга клетчаткага бай ризыклар белән дуслашырга кирәк. Гликемия индексы югары булган углеводлы ашамлыклар канда тиз таркала һәм шикәргә әйләнә. Мәсәлән, кәбестә шулай ук углеводка бай яшелчә, ләкин ул акрын таркала. Ә менә банан һәм кәнфит углеводы тиз таралу сәбәпле ашказаны-эчәк тракты аша канга эләгә һәм шикәр күләмен бик тиз арттыра. Шуна да җиңел углеводларны киметергә киңәш ителә. Бу шикәр, бал, сок, кайнатма, шоколад, банан, виноград һ.б. Диабетлы кешеләргә парда яки грильдә әзерләнгән, пешкән ризыкларга өстенлек бирергә кирәк. Кыздырылган азыктан баш тартсаң яхшырак. Күпләр диабет вакытында диетага утырырга кирәк дип борчыла. Әмма, моны үзеңне ризыклардан чикләү дип түгел, ә дөрес, файдалы туклануга күчү дип кабул итәргә кирәк.