Ул автохуҗалыкны күреп, Мәдинәнең исе китте. Үзе зур, андагы машина, андагы чисталык! У...
Ул автохуҗалыкны күреп, Мәдинәнең исе китте. Үзе зур, андагы машина, андагы чисталык! Ул, беренче эш итеп, билгеле инде, медпунктка юнәлде. Егылып китә язды — әллә ничә кабинет, андагы аппарат! Аппаратларның маркаларын, ни өчен кирәклеген, кайдан алырга мөмкин икәнен барысын да язып алды. Шәфкать туташлары гына түгел, ничә төрле табиб кына килеп эшли икән монда! Бу юнәлештәге уйлар Мәдинәнең хыялында бар иде барын. Тик ул аларны тормышка аша торган итеп уйлый да алмый иде. Була икән бит, Мәскәүдә шулай эшләп яталар икән әнә! Казанда да эшләп була бит моны, ник башкарып булмасын ди, кайда да шундый ук кешеләр эшли ләбаса! Аннан чыккач, Мәдинә ашханәгә керде. Монда искиткеч ямьле һәм зәвыклы иде. Әзерләнгән ризыкларның тәмлелеге турында әйтәсе дә юк. Мөдир белән бик озак сөйләшеп утырды. Мөдир аңа: — Матурлык кирәк, һичшиксез, матурлыкны барыбыз да яратабыз. Ләкин ашханә өчен беренче пешекченең оста булуы мөһим. Мин монда мөдир, безнең аерым шеф-поварыбыз бар, аның, билгеле, хезмәт хакы да икенче төрле — премияләре әйбәт. Ул кешене алгач, ризыкның тәме сизелерлек яхшырды, узебез уйлап тапкан "фирменный" ризыкларыбыз да барлыкка килде. Аннан соң, без ашханәдә чит кешеләрне дә ашатабыз, соңгы вакытта мәҗлесләр үткәрүгә заказлар да кабул итәбез. Безнең ашханә оешмага бик әйбәт керем бирә. Бу саннарны чит кешегә күрсәтергә ярамаса да, сер итеп кенә күрсәтәм, карагыз. Мәдинә нәтиҗәләрне күреп шаклар катты. Мөдиргә рәхмәт әйтте, үзе белән күчтәнәчкә алып килгән чәкчәк белән чәй эчтеләр. Мөдир соңынан шеф-поварны чакырып, чәкчәктән авыз итәргә кушты. Мәдинәдән аны пешерү рецептын сорап алдылар. Бу аларда иң күп сатыла торган тәм-том булачагын әйттеләр. Мәскәүләрнең шулай тиз эләктереп алып, нәтиҗәне алдан күрә белүләренә исе китте аның. Илфатның ел ахырында эше бик күп булганга, күптән очрашканнары юк иде, бер-берсен шундый сагынганнар икән. Рәхәтләнеп ял итеп, Мәскәү кибетләреннән матур әйберләр алып, биш көнләп йөреп кайттылар. Мәскәүдән кайту белән, Мәдинә, язуларын тотып, директор янына керде. Аның өчен директор күптән "Сан Саныч"ка әйләнгән иде инде. Аны хуҗа якты йөз белән каршы алды: — Нинди планнар белән кайттың инде син? Нинди суммалар кирәк булыр икән инде сиңа, Алексеевна? Мәдинә ул оешманың медпункты, ашханәсе турында сөйләде. Соңыннан үзләренекен ничек үзгәртергә теләве турындагы планнарын уртаклашты. Директор Мая Алексеевнаның идеяләре бик ошаганын, ләкин быел икесенең берсе генә барып чыгачагын әйтте. Мәдинә бу сүзләргә әзер иде, чөнки Сан Саныч Мәскәүдән үзе дә бик зур планнар белән кайтты аларны тормышка ашыру өчен дә күп акча кирәк булачак. Хатын янә сүз башлады: — Александр Александрович, әгәр болай итсәк: медпунктка аппаратураны поликлиникадан сорыйк, безгә башлап җибәрү өчен яңа булмаса да ярый бит. Хәзергә теш дәвалауны, терапевт, уролог кебек белгечләрнең кабул итүләрен оештырыйк. Табибларга хезмәт хакын безнең оешма түли. Анда зур сумма җыелмый. Ә ашханәгә килгәндә, мин анда бүген булдым. Ремонтны үзебезнең эшчеләр ясый ала, материалга күп акча китмәс. Ашханәне бизәү турында уйлашырбыз, бәлки, татар милли рухында ясарбыз, халык арасыннан эзләрбез осталарны, конкурс игълан итәрбез. Ә менә ашханә мөдирен бүген үк алыштырырга тәкъдим итәр идем. Анда санитария шартлары үтәлми, әзерләгән ризыклары һич кенә дә мактап ашарлык түгел. Шеф-повар турында әйтмим дә инде. Анысы — алга таба. Аннан, әйдәгез, ашханәдә чит кешеләрне тукландыру турында да уйлыйк әле. Александр Александрович Мәдинәнең урынлы сүзләр әйтәсен белә иде инде. Үзе дә ашханәдә үзгәрешләр кирәклеге турында күптәннән уйлап йөри, тик әлегә кадәр кулы гына җитмәде. Шуңа да ашханә эшчәнлеген яхшырту юнәлешендә эшне иртәгәдән үк башларга булдылар. Директор шулай ук Мәдинәгә поликлиникага барырга, табиблар хакында, ә җае чыкса, аппаратлар турында да белешергә кушты.