ул. – Бүген әниләрдә кунам, ә иртәгә әзрәк тыныч күңел белән нәрсә булса да уйлармын», ...
ул. – Бүген әниләрдә кунам, ә иртәгә әзрәк тыныч күңел белән нәрсә булса да уйлармын», – дип, машинасын үзләренең капка төбенә туктатты. Әнисе йоклаган иде, әмма ана йөрәге сизгер шул. Капка төпләренә машина килеп туктауга, Мансур капканы ачып өйгә кереп җиткәнче, ул, өстенә камзулын эләктереп кенә, өйалды ишегенең келәсен күтәрде. – Улым, син ничек әле болай таң алдыннан, каян кайтып киләсең? Берәр хәвеф-хәтәр булмагандыр бит? – дип, әнисе Мансурны өйгә уздырды. – Әни, борчылма, бернәрсә дә булмады. Эштә шулай килеп чыкты. Өйдәгеләрне уятасым килмәде. Ә син – минем әни! Син мине һәрчак кичерәсең! – диде Мансур, әнисенә салмыш икәнлеген сиздерергә тырышмыйча. Ләкин ана кешене алдап буламы соң?! – Син нәрсә, улым, салмыш мәллә? Төне буе аракы эчеп йөрдеңме әллә? Нәрсә булды? Фирүзәң белән ачуланыштыңмы? Хәзер инде кеше көлдереп йөрмә! Малаегыз бар. Аңа нәрсә әйтерсең? Алар бик тиз үсә. Син, улым, минем сүзгә карама! Теге көнне мин сиңа артык сүзләр әйтеп ташладым. Нишлисең инде, мин – ана кеше! Сиңа һәрвакыт яхшылык кына телим. – Әни, мин барысын да аңлыйм, ләкин менә монда нәрсәдер утыра. Менә шуны үткәреп булмый! – Мансур кулы белән күкрәк турысына күрсәтте. – Улым, син нигә җебеп төшәсең әле? Син аны үзеңнән югарырак дип саныйсыңмы? Ялгышма! Әгәр ул сине ярата икән, димәк, сез тигезләр! Тигезләр икән, бер-берегезгә дөрес җавап бирегез. Бер-берегездән көнләшмәгез! Көнләшү бер-берегезне кимсетүгә китерә. Ярар, булды! Чәй эчәсеңме? – Юк, әни! Хәзер йокларга ятам, ә иртәгә мин Фирүзә белән аңлашам! – дип, Мансур яшь чакта өйалдында йоклый торган урынына китте. Мансур тиз генә йоклап китәргә уйласа да, аның күзенә йокы кермәде. Бүген булып узган вакыйгалар бөтен күңелен актарды. Бер уйлаганда, алар икесе дә, бөтен дөньяларын онытып, рәхәтләнеп ял иттеләр. Икесе дә, яшьлекләренә кайтып, бала чакларын искә төшерделәр. Әкияттәге ике сәяхәтче булып, борынгы сарай йозагына ачкыч яратып, эчкә уздылар һәм үзләрен бер-берсен яратучы принц белән принцесса итеп, ялгыз сарайда хисләр диңгезенә чумдылар... (Дәвамы бар.)