үзләренә орлык салганнарын көтеп яталар. Мансур бу көннәрдә өенең кайда икәнен дә онытт...
үзләренә орлык салганнарын көтеп яталар. Мансур бу көннәрдә өенең кайда икәнен дә онытты. Тамагына кайда туры килсә, шунда ашады. Кайда туры килсә, шунда әзрәк кенә ял итеп алды. Тәүлекләр буе дип әйтерлек басуда булды. Орлык алырга әзер басуларны күреп, йөрәге әрнеде. Әнә, тырмадан соң җитлеккән күпме басулар көтә! Культивация белән чәчү арасында ярты көнлек ара. Аны берничек тә кыскартып булмый. Йә техника ватыла, йә орлык әзерләнеп бетми. Мансурга болар бик тә кыргый күренде. Менә хәзер аңлады инде ул агроном Рәиснең әйткән сүзләрен: «Син – скрипач түгел, ә дирижёр! Ә оркестрың әйбәт барып чыксын өчен, алдан әйбәтрәк әзерләнергә кирәк икән!» Хәзер инде үткәннәрне сәбәп итеп үзеңне яклап булмый. Үзеңне аямыйча, бөтен язгы эшләрне вакытында бетереп чыгарга кирәк! Шул чагында гына син үзеңне хуҗалыкның директоры итеп хис итә аласың, дип уйлады ул ачуы килгән чагында. Соңгы вакытларда Фирүзә белән араларында туган салкынлык бер-берләренә хиссезлек уятты. Өйләрендә алар сирәк очраштылар. Берсе дә нинди дә булса сәбәп табып, үзләрен борчыган мәсьәләләрен уртага салып сөйләшергә батырчылык итмәде. Әмма бер-берләренә туган бу хиссезлекнең озакка бармыйча, кайчандыр беркөнне ташыячагын яхшы аңлыйлар иде. Ул үзен язгы кыр эшләре бетүгә барып, күңелләре ял эзли башлагач та сиздерә башлады. Ләкин алар икесе дә үзләренең үпкәләре аша атлап чыга алмадылар. Беренче булып баш ию алар өчен кимсетелүгә, үзеңнең булмаган гаебеңне тануга китергән кебек тоелды. Иртән бер кат басуларны әйләнеп кайтып контор янына килеп туктауга, Мансурны телефонга чакырып алдылар. – Мансур абый, син инде чәчү дип терлекчелекне ташлап бетермә! Син яхшы аңлыйсыңдыр инде, безнең бит Европа партнёрлары белән төзелгән килешү бар. Әгәр без сөт савуны контрольдә тотмасак, бу килешүләрне яндырып, бик күп акча югалтачакбыз. Ул гына да түгел, үзебезнең маркабызны таптаячакбыз! Аннан безгә беркем дә ышанмаячак! – диде бик таныш дулкынланган тавыш. Мансур бер мизгелгә аптырап калды. Нәрсә сөйли алар? Шул вакытта аның башына килеп җитте. Бу бит Нәфисә! Сату буенча директор. Сөт белән нидер булгандыр инде. Кичәге сводкалар буенча, аның хуҗалыгында сөт буенча тәртип иде. Ә бүгенге сводканы карамады әле. – Нәфисә, исәнме! Син инде безнең кебекләр белән исәнләшә дә белмисең, ахры. Нәрсә булган?! – Мансур абый, син мине гафу ит! Шулай туры килде инде. Кичә сездән килгән сөттә антибиотик таптылар. Ярый әле сөтегез комплекс сөтенә кушылып өлгермәгән. Кушылган булса, бөтен агрофирма бушка эшләгән булыр иде. – Ярар, Нәфисә, рәхмәт инде сизеп өлгерүегез өчен! Мин хәзер, фермага барып, нәрсә булганын ачыклыйм һәм сезгә шалтыратырмын! – диде Мансур коры гына. – Әгәр рөхсәт итсәгез, мин үзем дә килеп чыгам әле. Чөнки бик еш сөтегез пычрак була. Нинди сәбәпләре бар икән? Шуларны ачыклап, гаепләрен бетерергә иде. – Нәфисә, мин көтәм! – дип җавап бирде Мансур эчке күтәренке тавыш белән. Ул әкрен генә трубкасын куйды да күзләрен бер ноктага текәп уйга калды. Аның күз алдына теге вакыттагы очрашу килеп басты. Нигә ул аңа, башка очрашмыйбыз, дигән икән. Димәк, ул аңа ошамаган. Ул аның белән артык салкын булгандыр. Юк, алай булмагандыр! Әгәр салкын булса, алар ул кичләрен шулай матур уздырмаган булырлар иде. Нигә ул аны кире какты? Үзенең егетен артык яратканмы? Бәлки, шулайдыр да! Чөнки аның баласы булып та, ул аңа кияүгә чыккан. Әгәр алар очрашуларын дәвам иттергән булсалар, ничек булып бетәр иде икән. Бәлки, аларның хисләре мәхәббәткә әверелгән булыр иде. Ул вакытта Фирүзә нишләп бетәр иде? Нәрсә булсын, онытылыр иде! Фирүзә белән яшьлегенең иң беренче хисләренең ләззәт тойгысын татыды. Шуңа күрә ул, беркайчан да онытылмыйча, аның йөрәге түрендә сакланды. Аның кабат андый мизгелләре булмады. Һәм ул мизгелләр, күңелендә янып, аны һәрвакыт үзенә тартып тордылар. Шулармы аны ярату белән бутады? Бәлки, шулайдыр да! Мансур авыр гына сулап куйды да, әкрен генә өстәл яныннан торып, сәркатип кызга үзенең хәзер фермага барасын һәм, аны эзләп килүче булса, кайда икәнлеген әйтергә кушты.