– Гөлзәлифә, соң, бөтен кеше белә бит инде. Син җүләр түгел ич, шуны да аңламаска. Хари... — 1 сентября 2026 г. в 16:51:05.391
– Гөлзәлифә, соң, бөтен кеше белә бит инде. Син җүләр түгел ич, шуны да аңламаска. Харис тиктомалга чапмый бит инде ул командировкага. Ай саен командировка булмый. Мөнир дә белә, әни дә белә. Кем генә белми! Ә син болытлар арасында очып йөрисең. Гөлзәлифә килеп утырды, машинаның ишеген бар ачуы белән шапылдатып япты да тәрәзәгә таба борылды утырды. Ул дөреслекнең йөзенә карарга теләмәде. «Бар да белә!» дигән сүз йөрәген кайчы белән телгәләп төшергәндәй итте. Әлбәттә, тоя Гөлзәлифә иренең үзенә мөнәсәбәтен, ләкин сорашырга, аңлашырга курыкты. Ялгыз калудан, ташлап китүеннән курыкты. Улын атасыз калдырудан курыкты. Дөньяда кешеләр өстеннән курку хакимлек итә! Менә бит! Инде бөтенесе белә икән. Ә ул җүләр хәлендә. Әнә шул җүләр булганга монда килде дә бит инде. Гөлзәлифә үртәлде дә, нәфрәтләнде дә. – Сиңа бит әле генә киңәш иттеләр. Тормышыңны үзгәрт, үзеңне ярат, диделәр. Тыңладың, ләкин ишетмәдең, шулай бит? Гөлзәлифә дустына үпкәләми. Ничек кенә авыр булмасын, ул аны ташламаячак. Дөреслекне дә ул әйтмәсә, кем әйтер? Әнә бит, барысы да астан гына көлеп йөриләр икән бит. Белмәгәнгә салынып. Ул, машинасын кабызып, бераз җылынганын көтеп торды да, ерак юлга кузгалды. Гөлзәлифәнең тормышында яңа юл да шушыннан башланды. (Дәвамы бар.)