машинага утырып, әниләренә күчтәнәч илтергә барганда, бөтен күңеле сөенечтән балкыган и...
машинага утырып, әниләренә күчтәнәч илтергә барганда, бөтен күңеле сөенечтән балкыган иде. Яман сүзләр ишетеп китеп бармаганы өчен кат-кат шөкер итте. Бу юлы Хәлим авылда 5 кенә көн торды. Озаккарак бала тугач кайтырга булды. - Ачуланмагыз инде әти-әни, Мөслимә, - диде ул, - сезнең хәлне белергә генә кайттым, аннары машинаны да кайтарыйм, дидем, улымны, бит машина белән алып кайтырмын, аннары аны да йөрергә өйрәтермен, Аллаһа теләсә. Малайдыр бит инде, - дип, Мөслимәгә карады, Мөслимә елмаеп кына куйды. - Аллаһ биргәне булыр, сау-исән генә тусын, - диде. Бала туганда кайтам, дип, китсә дә, кайтмады Хәлим. Улың туды, дип, телеграмма да бирделәр, җавап булмады. Мөслимәнең температурасы күтәрелде. Ахырда Кәбир аптырагач, әтиең авыр хәлдә, дип, телеграмма җибәрде. Әле Мөслимә тудыру йортыннан чыкмаган иде, санаулы сәгатьтә кайтып җитте Хәлим, әтисен бик ярата иде шул. Сау-сәламәт әтисен күргәч аптырап китте. Беренче телеграмманы алмадым, диде. Ике генә көнгә кайткан иде. Ул елларда баланың таныклыгын тудыру йортыннан чыкканчы ук яздыралар иде. Хәлим Мөслимә янына барып, туу турында белешмә алып кайтып, баланы яздырды. Исемен үз исеменә туры китереп Хәлил, дип, кушты. Икенче көнне әни белән бәбине үзе әйткәнчә, яңа машинасы белән барып алды. Әллә артык борчылып йөргәнгә бала бик елак булды. Төннәр буе керфек какмады гаилә. Ике көнгә кайткан ир китә алмыйча аптырады. Дуслар,танышлар белән бала тәпие юа-юа, шактый гына исереп тә кайта башлады. Баланың елавы да гаеп саналды. Әле бит өйләнү, бала карау аның планына кермәгән иде. Бала да карый алмагач, нигә табарга иде, дип, Мөслимәне дә елатты. Ахырдан кичен чыгып китеп каядыр кунып кайта башлады, сүз әйттермәде үзенә, тавышланды. - Ни булды, сиңа улым?! - диде әтисе, - эчкече булып бетәсең бит инде, әллә читтә гел эчеп ятасызмы? Хатының әйбәт, улың бар, дәүләтебез җитәрлек, ни җитми сиңа улым? Көне буе балтаң суга төшкәндәй йөрисең... - Ни кирәк соң сезгә әти? - диде Хәлим, - рәнҗегәндәй. Әгәр анда эчеп ятсам, машина, акча каян килер иде соң? Яныгызда яраткан киленегез, оныгыгыз. Өйлән дә, өйлән, дип, йөдәттегез. Синең авырыйм, дигән телеграммаңны алгач, мин эштән сорамыйча кайттым, хәзер мин анда бара алмыйм, чит кешеләр белән эшлисем килми. Монда да эшкә керә алмыйм, документларым анда калды. Хәлимнең эчеп кайтулары ешайды, инде хәзер тизрәк эшенә китсен, дип,тели башладылар. Шуннан эшеннән чакыру килеп, китеп барды. Мөслимә авыр сулап куйса да, риза булды. Хәлимнән хәбәр килмәде, танышлар аша бу юлы Хәнияне дә алып киткән, дип, сөйләделәр. Мөслимә ышанмады. Хәлим авылда булса, бергә яши алмавына ышанган иде инде ул. Әле болай ул ирле, гаиләсе төпле, акыллы. Аны яраталар, хөрмәт итәләр. Еллар үтте. Кәбир бер атналап кына ятты да кайтмас җиргә китеп барды, Хәлилнең укырга керүен бик күрәсе килгән иде, насыйп булмады. Телеграмма җибәргәннәр иде, улы кайтмады. Тигез гомер иткән бәхетле парлар берсеннән берсе аерылса, озак яши алмый, диләр. Шулай итеп гомер көзенә дә керер-кермәс Хәлимә дә китеп барды. Әле аларны озаткач та 3 ел яшәде Мөслимә. Йорт тузмасын, диде, улымның сыйныфташлары, диде, эшләгән иптәшләрем, диде. Кадыйр ике йорт алып барырга теләмәде. Зур уллары Мөслим укуын бетереп, Мәскәү кызына өйләнеп, яхшы гына төшемле эшкә урнашты һәм килен яшәгән ике бүлмәле фатирны апасына биреп, үзе янына эшкә урнаштырды. Мөслимә 2 ел улы белән генә яшәгәч, хатыны үлгән, Хәлил белән бер яшьтә кызы булган әйбәт кенә иргә кияүгә чыгып куйды. Яшьлегендә кия алмаган туй күлмәген киеп, балдаклар алмашып өйләнештеләр алар. Бик мәрхәмәтле, бик уңган ир булып чыкты Ризван, аңа ышанды Мөслимә, яратасы, яратыласы килә иде аның. Мәхәббәт җимеше булып кечкенә уртак уллары тугач, Хәлим, дигән кеше еракка, артка чигенде. Үткәнгә юллар ябылды.