Каядыр юкка чыкты. Үзебез дә аптырашта», – диде. Аннан соң, үз өстеннән бурыч төшергәнд...
Каядыр юкка чыкты. Үзебез дә аптырашта», – диде. Аннан соң, үз өстеннән бурыч төшергәндәй: «Андый сәер яклары элегрәк тә булгалый иде», – дип өстәде. Женя Кривошеев турында сорашмадылар. Ул бу вакытта өендә, качып-посып, кулындагы ярасын дәвалап ята иде. Егеткә больницага барырга ярамый – утлы коралдан яраланганнар турында мәгълүматларны шунда ук эчке эшләр идарәсенә тапшырачаклар. Ә анда инде төпченеп, төбенә төшмичә туктамаячаклар: кайда, ничек, ни өчен? Вася да үз чиратында тикшерүчеләрнең Женя хакында кызыксынмауларына сөенеп куйды. Теге көнне кемнең кем икәнлеген танымый калганнар, күрәсең. Маратны таныганнар менә. Вася өчен анысы тагын да гаҗәбрәк. Бу үзе үк Маратның милиция кешесе булуын раслый кебек. Ә Хәкимыч бу хәлләргә кайсы яктан бәйле икән? Марат турында, «чыбык очы туганым» дип, Васяның күзенә төтен җибәргән булды… Шуңа күрә ул, бер очрашканда, Наил Хәкимовичка үзенең бөтен ачуын чыгарды. Нур Гаянович турында да шул чакта искәртте. «Үзеңнең артың пычрак икән, башкаларныкын тикшермә», – диде, бик мәгънәле генә карап. – Чыбык очы туганыңны безнең арага нинди максат белән тыккан булгансыңдыр, анысын белмим, ләкин ул иң кыен чакта тәртәгә типте. Бөтен эшне бозып ташлый язды, – дип, Марат турында да исенә төшерде. Тик артыграк сөйләп ташлаганын аңлап, бу хакта сүзне озынга сузарга теләмәде. Соңыннан, хәер, Хәкимыч инде күптән хәбәрдардыр, дип уйлап үзен юатты да, бүтән сүзем дә юк, сөйләшергә теләгем дә юк дигәндәй, кулын селтәп китеп барды. * * * Оешкан жинаятьчелеккә каршы көрәш бүлегенең оператив төркем җитәкчесе Гомәр Саттаров Ялантау янында тамерланлылар һәм әфганлылар төркемнәре арасында булган вакыйгадан соң бүлек башлыгы Әнис Шәрифуллин янына керде. Ул анда «стрелка»да катнашкан әлеге ике төркем турында мәгълүматлар тупланганлыгын белә иде. Тамерланлыларның шәһәрдә нык йогынтылы төркем икәнлеге дә Гомәргә күптәннән мәгълүм. Әле сиксәненче еллар азагында ук җәмгыятьтәге үзгәрешләргә, аның эчтән какшый башлавына бәйле рәвештә шәһәрдә яшьләр арасында шикле төркемнәр оеша башлады. Моңа күп еллар дәвамында яшьләрне тәрбияләп торган пионер, комсомол оешмаларының таркалуы сәбәп булгандыр, мөгаен. Аларга ниндидер алмаш кирәк бит. Изге урын буш тормый, диләр, яшьләрнең күңеле дә буш була алмый. Барысы да шуннан башланды булса кирәк. Төркемнәр әнә шундый җирлектә оешты. Шәһәрдә теге яки бу төркемгә карамаган яшьләр юк иде диярлек. Булсалар да, бармак белән генә санарлык һәм, гадәттә, андыйлар кимсетелүләргә дучар иде. Шуннан соң дистә еллап вакыт узды. Җинаятьчел төркемнәрнең күпчелеге таркалды, алар урынына яңалары барлыкка килде. Ә менә «Тамерлан» шул еллардан ук, ничектер башкалар белән булган конкуренциягә бирешмичә, тотрыклы яшәвен дәвам итә. Үзләренә каршы төшкәннәргә аеруча кансызлык күрсәткәннәре өчен, җинаятьчел төркемнәр алардан бераз шүрли дә иде хәтта. Ә менә әфганлылар төркеме тамерланлыларга һич кенә буйсынырга теләмәде. «Әфганлылар» дип аталсалар да, төрмәдән чыккан, үткәннәре караңгы адәмнәр җыелган бу төркемнең Әфганстан һәм башка кайнар нокталарда хезмәт итеп кайтканнар – ветераннар оешмасына да, кайчандыр кризис шартларында әфганчыларны эш урыннары белән тәэмин итү максатында төзелгән автомобильләргә ремонт ясау станциясенә дә бөтенләй кагылышы юклыгын Гомәр бик яхшы аңлый. Мондагы егетләрнең Василий Кулагин командалагында ниндидер кыңгыр эшләр майтарып йөргәнлеген ул күптән түгел генә белде. Сирәк булса да, әле тегендә, әле монда бу исем калкып чыга башлады. Эчке эшләр идарәсенең оешкан җинаятьчелеккә каршы көрәш бүлегендә алар өстеннән аерым «эш» ачылган. Әледән-әле хокук бозулар кабатланып тора. Әлбәттә, хокук сакчылары тарафыннан әфганлылар төркеменең һәр адымы контрольдә. Һәрхәлдә, рәсми документларда бу шулай. (Дәвамы бар.)