Бу юлы менә шушы өстәл дә ярап куяр…
Бу юлы менә шушы өстәл дә ярап куяр… Закир, нәрсәдер аңлатырга тырышып: «Соң, егетләр…» – дип мыгырдана башлаган иде, Вася аны шунда ук бүлде: – Станокларың бар, кабат ясарсыз. Ә монысын иртәгә, минем егетләр машина белән килгәч, салып җибәрерсең. Аннан, Закир, аң бул, миңа тере акча кирәк. Икенче килгәндә, агач белән генә котыла алмассың. Монысында гафу итәм… Аннан соң, Закирның энесе ягына борылып: – Ә син, үләксә, кулыңны кемгә күтәргәнеңне белеп күтәр. Юкса… – Вася нишләтәсен әйтеп бетермәде, лачкылдатып идәнгә төкерде дә ишеккә борылды. Яраннары, бер командага буйсынгандай, аның артыннан атладылар. Косой, абыйлы-энеле эшмәкәрләрнең каршысын нан узганда, уң кулының биш бармагын да тырпайтып, Закирның йөзенә якын китереп боргалады, кыяфәтен чалышайтып, ырылдаган аваз чыгарды… * * * Вася соңгы вакытларда Наил Хәкимовичтан шикләнә башлады. Шулай булмый соң, тегесе гел тырнак астыннан кер эзләп кенә йөри. Ник тегеләй эшлисең, ник болай эшләмисең, тирәңә шикле адәмнәр җыйгансың, дип бәйләнеп тә алгалады. Димәк, аны юлыннан алып ташламакчы була. Инде үзләре янына мастерскойга Маратны урнаштыргач, бу шик көчәйде генә. Чыннан да, ул Вася урынына алмаш әзерли булса кирәк. Берчакны Хәкимыч: «Автомобильләргә техник хезмәт күрсәтү оешмасының элеккеге данын кире кайтарырга кирәк», – дигән сүзләр дә ычкындырды. Әйе, Васяның эшеннән канәгать түгел ул. Өстәвенә хәзерге вакытта оешманың җитәкчесе булып исәпләнүче Анисимов та инициативасыз кеше. Маратны әнә шул урынга әзерләмиме икән, дигән уй бораулый иде аның миен. Шикләнергә урын да бар кебек: Әфганстан һәм башка кайнар нокталарның ветераннар оешмасы да таркала башлады. Очрашулар әллә нигә бер генә була. Анда да егетләр бармак белән санарлык кына килә. Аңларга була – һәрберсенең тормыш мәшәкатьләре, һәркемгә гаиләсен тартып барырга кирәк. Наил Хәкимовичның оештыру эшләренә үзенең дә вакыт ягы тарайды. Шәһәр күләмендә башкарыласы җәмәгать эшләре башыннан ашкан. Аның өчен оешма хәзер икенче планга күчте. Бервакыт Наил Хәкимович, оешмага яңа рәис сайлап, җыелышларны җанландырып җибәрергә кирәк, дип тә сөйләнгән иде. Ул урынга да Маратны куюны күз уңында тоткандыр, бәлки. Бер атуда ике куян – ветераннар оешмасы җитәкчесе һәм шул ук вакытта шәхси оешма директоры да. Тик Вася моңа риза түгел… Алай гынамы, теше-тырнагы белән каршы… Вася, әлеге хәлләрдән соң, Наил Хәкимович турында: «Үсте, симерә башлады», – дип нәтиҗә чыгарды. Югыйсә, шуны кеше итү өчен алны-ялны белмичә йөгереп йөргәненә кайчан гына әле. Әйе, власть кешене боза шул… Бер югарыга күтәрелгәч, түбәндәгеләрне таптап узу җиңел. Югарыга күтәрелү өчен чиста юлдан гына бармады бит. Трест башлыгы Нур Гаяновичны юлыннан алып ташлаганда, Вася ярдәменә мохтаҗ иде ул. Депутатлыкка күрсәткәндә, халык арасында өндәү эшләре алып барганда да Васядан башка гына әллә нәрсә майтара алмас иде. Ә хәзер әнә ул кирәк түгел. Ярар, әгәр алайга китсә, Вася үткәндәге гөнаһларыңны тиз исеңә төшерер… Әйе, моннан җиде ел элек Нур Гаяновичны эшеннән алдыру да Васяның турыдан-туры катнашы булды. Тик бу эшне Хәкимычның хәер-фатихасы белән башкарды ул. Сүз дә юк, чиста эшләнде, беркем борынын тыгарлык түгел. Бу хакта бары тик ул да Хәкимыч кына белә. Шуңа күрә соңгы вакытларда булган эләгешеп алуларында ул моны козырь итеп куйды. Әйдә, нәрсә исе килгәнен тойсын, артык сикеренмәсен, дип уйлады ул. Анисимов дигән бәндәне рәсми рәвештә шәхси оешма директоры итеп кую Кулагинны исә чын мәгънәсендә чыгырыннан чыгарды. Әлеге урынны ул үзенә өмет иткән иде шул. Ә Наил Хәкимовичның уенда бөтенләй икенче булган. Бу нәрсә? Элекке дуслыкларын инкяр итүме, ышанмаумы, әллә башка сәбәпләре дә бармы?... Тик боларны ул Наил Хәкимовичның йөзенә туры бәреп әйтә алмады. Сез алай эшләсәгез, без болай да эшли беләбез дигәндәй, соңгы вакытларда әфганлылар җыелышына йөрми башлады. Читтән әшнәләр тапты. Шул бәндәләр белән аралаша башлагач, аның тормышы нигездән үзгәрде. Кем арбасына утырсаң, шуның җырын җырларсың, диләр бит. Вася акрынлап кыңгыр эшләргә керешеп китте. Яңа