үк нәрсәне сөйләде. «Андый кәкре тумраннарны ярганда, агач һәрвакыт сикерә. Мин сизмичә...
үк нәрсәне сөйләде. «Андый кәкре тумраннарны ярганда, агач һәрвакыт сикерә. Мин сизмичә калдым. Ул, арыганлыктанмы, агач өстендә йоклап килгән. Минем гаебем эш куркынычсызлыгының таләпләрен үтәмәүдә. Чөнки ул агач рамга кергәндә, аңа утырып барырга ярамый». Тикшерүчеләр бергә эшләгән кешеләрдән сорагач, алар берни дә күрмәгәннәрен һәм чынлап та кайбер очракларда тумранга утырып, аны селкетмәскә тырышуларын әйттеләр. Бәлки, бу хәл шулай беткән дә булыр иде, ләкин халык әйтемендәге «Тизәк чиләгенең капкачын ачсаң, исе чыгар» дигәнчә, тикшерү эшләре тирәнгәрәк үтеп, кумның пилорамнан чыккан материалның яртысын дип әйтерлек керемгә алмыйча, сатып ятканлыгын ачыкладылар. Менә монда инде, калганнары кебек, Наилгә дә чират җиткән иде. Ул аның шулай буласын алдан ук сизенде, чөнки кум эше буенча Наил – бердәнбер шаһит. Шуңа күрә ул соңгы вакытларда бик сакланып, алдын-артын карап йөрде. Төннәрен бик сизгер йоклады. Кайбер дуслары аша аның белән кемнең кулы уйнаячагын да сизде. Озакламый аңа эштән соң урман ташучы машиналарны бушатырга туры киләчәген хәбәр иттеләр. Ул үзенең иптәшләре белән машиналарны каршы алып, бушатуны оештырырга тиеш. Машиналарны башка вакытта эстакадага трактор бушатты. Ә бүген трактор ватык. Бүген нәрсәдер булачагын Наил сизде. Шуңа күрә аңа бик тә сак булырга кирәк иде. Пилорамда эш бетеп, чүп-чарларны җыештырып йөргәндә, машиналар да кайтып җитте. Өч машина. Агачларның ботаклары гына чабылып, бөтен буйлары белән машина әрҗәсенә һәм тагылмага салынганнар. Боларны кул белән бушату гаять хәтәр һәм авыр булачак. Ләкин нишлисең, син бит үзең теләп алмаган! Ә кемнеңдер боерыгы. Ул – синең өчен канун, аны үтәмәү мөмкин түгел. Машиналарның кабиналарында шофёрлары гына. Ләкин берсендә күрше барактагы урман кисүче отрядның бер кешесе утыра иде. «Бу тоткын берничек тә машиналарны озатып барырга тиеш түгел», – дип уйлады Наил. Димәк, ул аның артыннан килгән. Чыннан да, бүрәнәләрне бушата башлагач, теге кеше гел Наил тирәсендә кайнашты. Ике машинаны бушатканчы, Наил аңа бернинди дә мөмкинлек бирмәде. Исәбе аны чыгырыннан чыгару иде. Шул вакытта ул, нервыланып, сизгерлеген киметәчәк. Өченче машинаны бушатканда, игътибарсыз булып күренергә тырышты. Үзенең ломын тәгәрәргә җайлы агачка каршы кыстырып куйгандай итеп, иелеп, бауны сүтә башлады. Ул бауны сүтә башлауга, янына теге кеше килеп басты. Наил аңа, берни аңламагандай, хәзер бауны чишүгә, агачларның тәгәри башлавын искәртте. Ә үзе, бөтен гәүдәсен үзенә уңай җайга куеп, тегенең бөтен хәрәкәтен күз уңында тотарга тырышты. Теге кеше дә, үзенә басарга җайлы урын эзләп, аяклары белән бүрәнәне капшый башлады. Наилгә шул гына кирәк иде. Ул, тиз генә тураеп басып, аны йөктән аска таба төртеп җибәрде һәм итек кунычына кыстырган бәләкәй балтасын тартып чыгарып, чишелеп бетмәгән бауга чапты. Бүрәнәләр, үзләрен көчкә тотып торган баудан бушауга, йөктән егылып төшмәскә тотынып калган теге кешене эләктереп, аска тәгәрәделәр. Бу йөк ишелүе шундый тиз булды, беркем берни аңларга өлгермәде. Тегенең кычкырып куюын беркем дә ишетмәде. Чөнки һәркем үзен саклап калырга тырышты. Бүрәнәләр аска тәгәри башлауга, Наил машинаның алгы әрҗә рәшәткәсенә ташланды. Ләкин кулы белән рәшәткәне эләктерә алса да, аягы сузылып калып, аның өстеннән бүрәнә чыгып китте. Колагына аягының чытырдап сынган тавышы гына ишетелеп калды, һәм ул, аягы авыртуына чыдый алмыйча, аңын югалтты. Наил колония хастаханәсендә генә аңына килде. Аягына гипс салганнар һәм башын калын итеп марля белән ураганнар иде. Аңа теге кешене агач басып үтергәнлеген хәбәр иттеләр. Кумга суд булганда, ул әле хастаханәдә иде. Аны судка коляска белән алып килделәр. Судта берни дә белмәгәнлеген һәм көнлек эшләренең бер санын да үзгәртмичә конторга биреп барганлыгын әйтте. Инде терелеп аягына баскач, аның үзенә суд булды. Эш куркынычсызлыгы кагыйдәләрен бозуы аркасында ике үлем очрагы булу сәбәпле, элекке суд карарына тагын шуның хәтле өстәп, икенче колониягә җибәрделәр.