Тора-бара илдə заман җиллəре бөтенлəй башка якка исте, һəркайда үзгəртеп кору дип лаф о...
Тора-бара илдə заман җиллəре бөтенлəй башка якка исте, һəркайда үзгəртеп кору дип лаф ора башладылар. Китте болганыш, китте болганыш – һични аңларлык түгел. Кибетлəр бушады, сатып алырга акча да юк, эшлəгəн кешегə май, он, ярма һəм башка төрле азык-төлек бирəлəр. Хəбирнең дə чибəр дип кызыгып өйлəнгəн хатыны җилбəзəк булып чыкты, аерылып, каядыр чыгып югалды, балалары булмады. Яшьлектə күргəннəр җитмəгəн, инде тагын нилəр күрəсе бар икəн?" – дип көрсенеп куя Сабир карт кайвакыт. Ярый, аларның пенсия акчасы килеп торса, яшəргə булыр, менə яшьлəргə ничек юл ярырга? Төпчеклəре Кадрия дə: "Мин дə Таңсылу апам кебек табиб булам", – дип, югары уку йортында укып йөри. Кечкенəдəн əнисен күреп үскəн кыз медицинаны сайлагач, каршы килмəделəр инде. Бердəнбер көнне, чыннан да, Хəбир: "Безнең предприятие банкротка əйлəнде, хəзер бөтенлəй эшсез калдык", – дип кайтып керде. Эшсез калу дигəнне гомергə ишеткəннəре булмаган картларга бу хəл бик гаҗəп тоелды. Бергə утырып, төрлечə уйлаштылар, Себергə китим дисə, анда да эш хакы түлəмилəр, төрлечə алдау юлына басканнар, дип сөйлилəр. "Минем җыелган эш хакына бер "ГАЗ-53" автомашинасын тəкъдим итəлəр, тик бераз акча өстəргə кирəк", – диде Хəбир, эш урынына барып кайткач. "Алырга кирəк, улым, хуҗалыкта машина булса, эше табылыр, акча өчен кайгырма, əниең белəн минем бераз запас бар бит əле", – диде Сабир. Шулай итеп, ишегалдына күрер күзгə бик иске булмаган "ГАЗ-53" машинасы кайтып утырды. Лəкин анда-санда кешелəр йомышына йөреп кенə акча эшлəп булмавы Хəбиргə тиз аңлашылды. Ə əти-əнисендə икенче кайгы – малайны ялгыз яшəтергə ярамый, даими эше юк, эчү юлына да басарга мөмкин, өйлəндерергə кирəк. Əнə Касыйм абыйларының оныклары – кызларының кызы Илсөя базарда сату эшендə икəн, таныштырганда бик əйбəт буласы. Хəлбуки, бер авылныкы бит алар, бер-берсен белми түгеллəр. Əллə каян алып кайтты бит шул кашы-бите буяуга каткан чəч кисүче Ританы, баштан ук авыл кызларын күзлəсə ярамас идеме? Икесе генə чəй эчеп утырганда шулай дип сөйлəшеп алалар Гөлгенə белəн Сабир. Башта кабат өйлəнү турында ишетергə телəмəсə дə, Хəбир Илсөя белəн очрашудан баш тартмады. Гаилəдə өлкəннəр сүзенə колак салырга кирəк дигəн тəртип картəтилəре, картəнилəреннəн үк яшəп килə. Нишлəптер Илсөяне тиз үз итте ул, кыз да карышмады. Ике гаилə гомер буе дус булып яшəгəнлектəн, Касыйм абыйлары хакында гел яхшы сүзлəр генə ишетеп үскəн иде бит ул. Язылыштылар да əлегə туй ясамый гына яшəп киттелəр. Парлы тормыш парлы тормыш инде. Илсөя, бик чибəрлəрдəн булмаса да, акыллы, төпле фикерле кыз, дөньяның кайсы таба барганын чамалый иде. Əнə шəһəрдəге абыйсы Ильяс бер автосервисда эшлəп йөри, яхшы гына акча ала. Хəбир дə машина серен яхшы белə, нигə аңа да шундый эшкə тотынмаска? Уйлаша торгач, Хəбир үзенең гаражында гына мастерской ачып карарга булды. Əлегə зурдан кубып түгел, электəн дə аңа машинасын карап, төзəтешергə ярдəм сорап килүчелəр бар иде, əле дə юк түгел. Хəзер андый эшлəргə хак билгелəп, күбрəк клиент кына җəлеп итəргə кирəк. Əмма бу эш озакка бармады, каян белгəннəрдер, салым инспекциясеннəн килеп, законсыз рəвештə табыш алып ятасың дип, бəйлəнə башладылар. – Нинди табыш? Гаражда акча эшлəрлек итеп машина төзəтеп буламыни? – дип, гаражын ачып күрсəтте Хəбир. Чыннан да, анда машина ачкычлары белəн запас тəгəрмəчлəрдəн башка эш коралы юк иде. – Егет, син бик булдыклыга охшагансың, кулыңнан килсə, эшеңне дəвам ит, тик аны закон нигезендə теркəргə кирəк. Хəзер күреп торасыздыр, күплəр шəхси эшкуар булып формалаша, – диде олы гына яшьтəге салым хезмəткəре һəм Хəбирнең кулына эш башлау өчен кирəкле документлар исемлеген тоттырды. Хəбир бу кəгазьлəрне туплаганчы əллə күпме вакыт үтте. Нишлəсен, шулай кирəк булгач, ата-баба ишетмəгəн-күрмəгəн заманнар килде ич. Берара Илсөя белəн шəһəргə, аның абыйсы Ильяс эшлəгəн автосервисны күрергə дə барып кайттылар. Бу бик яхшы җиһазланган, зур цехны хəтерлəткəн эш урынын күргəч, Хəбир сызгырып җибəрде.