Егет булып җитеп килгəн улыннан һич читенсенмичə шундый кабахəт сүзлəрне сибəме?! Ярый,...
Егет булып җитеп килгəн улыннан һич читенсенмичə шундый кабахəт сүзлəрне сибəме?! Ярый, Хəйретдин агайны кешегə дə санамасын ди инде... Улы монда бит, Зөфəре!... Сүгенгəнне ишеткəне бар Хəйретдин агайның, ара-тирə сугышкалап та ала кеше дигəнең, бигрəк тə яшь-җилкенчəк кыдрач, авызларына аракы кердеме, күзлəре тона, куллары хəзер якага менеп җитə. Əмма чын күңелдəн каргануны күпме яшəп Хəйретдин агай беренче мəртəбə ишетте. Кем кемне каргый диген əле! Бездə, Татарстанда, Кама аръягында, Зəй төбəгендə йомшак һавалы тəмле сулы Язкилдедə! Язкилдедə гел яхшы кешелəр генə яши ала дип ышана иде Хəйретдин агай. Талашларны очраклы хəл, чəкəлəшеп алуларның да төп сəбəпчесе бары тик шул каһəр суккан зəм-зəм суы дип кенə белə иде. Ə монда Мирфатыйх белəн Сəлəхетдин дошманлаша! Терəлеп торган күршелəр, яшьтəшлəр, чордашлар, фронтовиклар! Алай гынамы əле сиңа, белə Хəйретдин агай, бик яхшы хəтерли: алар бит, алар!... Əллə үзлəре шуны оныттылармы? Үзлəре үк оныткач, башкалар ничек хəтерлəр, бала-чагалары, токымнары?! Һəр халык яхшы гореф-гадəтлəре, кунакчыллыгы, тəмле теле, хатын-кызларының буй җитмəс сафлыгы, горурлыгы, батырлыгы белəн мактанырга ярата. Чилəбегə баргач, базарда, иске-москылар рəтендə ике татарның Тукай теле белəн дөнья сасытып ызгышып ятуларын ишеткəч, Хəйретдин агай соң дəрəҗəдə рəнҗеп аларның янына барды. «Кардəшлəр, – диде ул, өне-тыны бетеп, – икегез ару ата балаларына охшагансыз, нигə алай үзегезне кадерсезлəп, башка халыкларны көлдереп талашасыз?!» Тегелəр ачудан күгəренеп бердəм рəвештə Хəйретдин агайны тетеп ташларга җыенганнар иде бугай, ак сакалын күргəч, оятларына көч килдеме, шыпан-шыпан гына икесе ике якка кереп киттелəр. Анда, читтə, сине беркем белми, син ирекле кош, дүрт ягың кыйбла, сүзеңə үзең хуҗа, үзең баш. Ə монда, туган авылыңда, нəсел-нəсəбеңне бөтен кеше белеп торганда, əле ерак бабаларыңның исеме телдəн төшеп онытылмаганда, токымыңның тере дəвамы күзе алдында... Сəлəхетдинне больницада калдырып чыкканнан бирле гел бертөсле авыр уйлар басты Хəйретдин агайны. Менə хəзер дə атын туарып япты, алдына коры печəн салды, «нəсел-нəсəбеңне» диде дə, бик бетəшеп, тəмам ватылып каланчаның түбəн баскычына барып утырды. Сəгать дисəм азрак, ике сəгать үк дисəм күбрəк булыр, һушын җыя алмыйча утырды да утырды, аптырау узмагач, дөньясына хəйран калып, тотты да Кирамнарга китте. Сер итеп кенə əйткəндə, əнə шул, базарда ызгышып яткан татарларны очратканнан бирле аның Чилəбедəн җаны бизде. (Дәвамы бар.)
Канал в каталоге Максиметера
4 581 подписчиков · Книги