тынычландырырга тырышып. Аның күңеле нигәдер уйный башлады. Әле ул моңарчы планнарын хы...
тынычландырырга тырышып. Аның күңеле нигәдер уйный башлады. Әле ул моңарчы планнарын хыялында гына тотса, менә хәзер аларны тормышка ашыру буенча эшли башларга кирәк булачак. Аңа, гади бер кызга, нинди ышаныч йөклиләр! Димәк, ышаналар, ә ышанычны акларга кирәк! Юк, ул калтыранып төшмәде, киресенчә, башын горур күтәреп, Аделгә карады. Адел исә Фирүзәнең күңелендәге бу кичерешләрне сизми дә калды. Ул да үзенең уйларына баткан иде, ахры. Аның башында хәзер шушы минутта Фирүзә белән сөйләшәсе сүзләр бутала иде. – Фирүзә, мин сиңа ышанам! Ышанмаган булсам, синең белән менә монда кара-каршы утырмаган да булыр идек. Ләкин ышану бер нәрсә! Хәзерге заманда зур эшләр башлап җибәрү өчен, сиңа ышанычың, тырышлыгың гына җитми. Өстән кемнәрнеңдер тырышлыгы булмаса, сине беркем дә белмәячәк! Шуның өчен дә миңа һәм кайбер кешеләргә, синең бу бизнес-планыңны уздырып җибәрү өчен, бик каты тырышырга туры килде. Бөтен чыгымнарны тәэмин итәр өчен, безнең үзебезнең ярдәм фондыбыз бар. Синең кебек булдыклы дип санаганнарны шул фонд ярдәме белән алга этәрәбез. Һәм, ул фонд саекмасын өчен, без һәрвакыт ссуда алучылардан, аларның алган суммаларыннан ике процент акчаны шул фондка күчерергә кушабыз. Ул күчерелгән сумманы сезгә, авыл хуҗалыгына ярдәм йөзеннән, федераль бюджеттан бирелгән сумма аша әкренләп кире кайтарабыз. Монда сез вакыт белән генә оттырасыз. Кыскасы, минем сүзләрне син аңларга тиешсең! Бу мәсьәләдә бернинди дә икеләнү һәм кырыйга тайпылып тавыш кубару булмаска тиеш! Тагын бер әйбер: син бу сөйләшүне беркемгә дә ычкындырмыйсың һәм, сөйләшкәнчә, әйтелгән сумманы авыл хуҗалыгы банкының менә шушы номерына күчерәсең, – дип, ул аңа саннар язылган кәгазь сузды. Фирүзә Аделнең бу сүзләреннән аптырап калды. Юк, ул дөрес аңлады. Аның башына шул гына барып җитмәде. Чынлап та аның бизнес-планы ошаганмы, әллә, үзләренең таныш кешеләре булгач, тирә-якка таратмас дип, акча суырыр өчен генә аның планын уздыралармы?! Аның горур башы, әкрен генә иелеп, Аделнең күзләренә карады. Аның күзләрендә салкынлык иде. «Үзе әйтмешли, аның бу ике проценты алар өчен ияләнгән бер нәрсә, ахры. Ул аны шундый тыныч әйтте, димәк, шулай тиештер инде», – дип уйлап куйды Фирүзә, дулкынлануын яшерергә тырышып. Ул тиз генә Адел биргән кәгазьне алып, сумкасына салып куйды. – Ярар, шулай кирәктер инде. Рәхмәт инде сиңа, Адел, ярдәмең өчен! Мин син әйткәнне үтәргә тырышырмын! – диде ул, күтәренке күңеленең төшә баруын сизеп. Адел Фирүзәнең бу үзгәрешен сизми калмады. «Әллә ялгыштыммы бу Фирүзә белән?» дигән уй яшен тизлегендә күңелен китеп узды. «Әгәр ул бу ике процентны күчерергә каршы килсә, мин иптәшләрем каршында нинди хәлдә калырмын? Бу мәсьәләне хәл итәрмен дип, миңа ышанып калдылар. Әгәр хәл ителмәсә, алар мине кичермәячәк», – дип уйлады ул. Һәм, киеренкелекне бушатыр өченме, берни дә булмаган кебек: – Фирүзә, акча бүгенге көндә инде синең счётыңа күчкән. Сиңа инде хәзер үзеңнең планнарың буенча эшли башларга кирәк. Акчаңны күчергәндә, бик сак бул! Хәзерге заманда алдарга күп сорап тормыйлар, – диде, аннан соң ул аңа агрофирмага юрист алырга кушты. – Син әле законнарны бик начар беләсең, ә юристың булса, үзеңә җиңелрәк булыр! – Адел кесәсеннән акча чыгарып өстәлгә куйды. – Кайткач, Светланага миннән һәм Заринадан күп итеп сәлам әйт! Алар сине сагынганнар инде, тизрәк кайтуыңны көтәләр, диген. Адел урыныннан торып басты һәм, Фирүзәгә урыныннан торырга ярдәм иткән кебек, аның кулларыннан алып, ишеккә таба юнәлделәр. Рестораннан чыккач, Фирүзә Аделгә тагын бер кат рәхмәтен белдерде һәм, кайсы якка таба юл тотарга дигән кебек, як-ягына каранып куйды. – Сине вокзалга озатып куяргамы? – дип сорады Адел, аның кая барырга икеләнеп калуын күреп. – Юк, рәхмәт! Мин әле әзрәк кибетләрдә йөрим, аннан нәселле терлекләр турында белешмә аласым килгән иде. Үзең әйтмешли, хәзер инде сузып булмый! Шуның өчен нәселле терлекләр берләшмәсенә кереп чыгармын дигән идем. – Ярар хәзергә, очрашуларга кадәр! – Адел Фирүзәгә кулын биреп саубуллашты да машинасына таба китте.