тактага әйләндереп, столярлык цехларына төрле кирәк-яраклар ясыйлар. Ә яшьләр һәм яшь б...
тактага әйләндереп, столярлык цехларына төрле кирәк-яраклар ясыйлар. Ә яшьләр һәм яшь балалы хатын-кызлар өчен кием тегү цехы эшләп тора. Бәләкәй генә сөт эшкәртү цехларында эшләнгән сыр һәм май Мәскәүдә оештырылган ярминкәдә алтын медальгә лаек булды. Хәзер аларның хыялы сыр һәм май белән Европа ярминкәләренә чыгу. Менә шул зур производствоны алып бару өчен күпме энергия кирәк! Анысын да бераз гына булса да җиңеләйтер өчен, үзләренең бәләкәй генә су электростанциясен көйләп куйдылар. Кыскасы, хезмәт булганда гына уңышлар көтелә! – дип тәмамлады ул сүзен. * * * Көз – авыл җирендә ел буе куйган хезмәтнең нәтиҗәсен барлау һәм алдагы ел өчен планнарыңны кору чоры. Табигать белән аралаша алып, аңа куйган хезмәтеңнең мул итеп кире кайтарылуы авыл халкының алдагы яшәешенә турыдан-туры бәйле. Фирүзә авыл тормышының бу язылмаган законнарын үзенең җилкәсендә тойган иде инде. Шуңа күрә дә ул, кыр эшләре бетүгә, булып узган хезмәт чорына тирәнтен анализ ясарга ярата. Табиб-хирург кебек, күбрәк игенчелекне актарды. Кайсы басу быел күпме уңыш биргән һәм нигә шулай. Нигә ул артык йә ким биргән. Хезмәт бит барыбер керә, ә күрсәткечләр төрлечә. Нәрсә җитми йә нинди сәбәпләр аның уңышын арттырган. Терлекчелектә исә ул көннекен-көнгә анализлап барырга тырышты. Икътисадчылар көне-төне саннарга күмелеп утырганда, Фирүзәнең башында барысы да ап-ачык иде инде. Соңгы елларда аның хуҗалыгы игенчелек һәм терлекчелек өлкәсендә зур уңышларга ирешеп, ил буенча иң әйбәт хуҗалыклардан санала. Алар җитештергән яшелчә, сөт һәм иттән ясалган ризыклар күп шәһәрләрдә яратып сатып алына. Үсемлекчелектә зур уңышлар алу, терлекчелектә бөтен эшне югары технологиягә күчерү һәм нәселдәнлекне яхшырту, сыерларның сөт бирүен арттыру сәбәпле, Фирүзә алган кредитын вакытында түләп барып, алдагы елларда тагын буласы үзгәртеп корулар өчен күпмедер акчасын янга калдырырга тырышты. Бу уңышлар үзенең тырышлыгы нәтиҗәсе икәнен аңлый иде ул. Әйе, кеше хезмәтенең уңышлары белән бай! Фирүзәне бу ирешелгән уңышлар гына туктата алмады. Аның төп хыялы Европа фермерлары белән беррәттән атлау иде. Моның өчен аңа күп укырга һәм хәзерге технологиясе күпме алдынгы булса да, аны тагын да камилләштерергә кирәген ул яхшы аңлады. Соңгы елларда улы белән бергә ныклап инглиз телен өйрәнергә тотынды. Сөйләм телен бик яхшы белмәсә дә, укып, үзенә тәрҗемә итте. Кичләрен икәүләшеп инглиз телендә сөйләшә башлаганда, әнисе алардан «нинди сакаулар җыелган монда» дип көлә иде. Ул инде берничә мәртәбә Авыл хуҗалыгы министрлыгы оештырган чит ил семинарларында булып, барган саен алдынгы яңалыклар күрсәтелгән журналлар күтәреп кайта һәм кичләрен аларны укып өйрәнә иде. Үзенә ошаганнарын дәфтәренә теркәп барды. Аны бигрәк тә сыр һәм ысланган ит әйберләре кызыксындырды. Ул продукция белән Мәскәү ярминкәсендә алтын медальләргә лаек булган иде инде. Ләкин Италиядә булачак ярминкәдә катнашып яхшы урыннар алу өчен, элеккеге рецептлар белән генә әллә кая китеп булмасын аңлады. Халык рецептларын өйрәнеп, чит ил журналларында чыкканнарын кулланып, үзенең яңа рецептын ясарга теләде. Үзенең фикерләрен Нәфисә белән уртаклашты. Ул аңа үзләренең ит ыслау рецептын авылларындагы керәшен карчыгы Марфа түтидән алганлыгын әйтте. – Халык аны, Нәфисә, буыннан-буынга өйрәнеп, яхшы якка нәрсә булса да өстәп, бүгенге көнгә китереп җиткергән һәм әле ул аны киләчәк буыннарга да калдырачак. Чөнки ул – халыкның көндәлек ризыгы. Безгә хәзер сыр буенча күп рецептлар табарга кирәк. Әмма ничек табарга? Мин инде әни белән дә, күрше Бибинур апа белән дә сөйләштем. Ләкин алар бу тирә ярминкәләрдә сыр сатучыларны хәтерләмиләр. Әни генә бәләкәй чагында Теләче базарында сыр сатып алганнарын исенә төшерде. Бик тәмле иде, ди. Әби шул чагында: «Менә бит марҗалар әче сөттән нинди тәмле ризык әзерлиләр», – дип әйткән. Хәзер ул рус хатынын каян табасың, базар да юк бит инде, – диде Фирүзә, уйчан гына.