– Мин складны ачып керүгә, бәйләмле такталар әз кебек тоелды, һәм саный башладым. Өчәү ...
– Мин складны ачып керүгә, бәйләмле такталар әз кебек тоелды, һәм саный башладым. Өчәү җитми. Аннан соң эшчеләрне чакырдым. Директор килгәч, аннан сорадым. – Складны ачканда шикләнерлек нәрсә сизмәдегезме? – Юк, бернинди шикләнерлек әйбер күренмәде. Конторны үз ачкычым белән ачып кердем, склад ачкычы урынында иде. Аны алып складны ачтым. Йозак гел элеккечә ачылды. – Ачкычлар кайда тора? – Контор ачкычы берсе миндә, берсе директорда. – Каравылчы кайда? – Ул өч көнгә еракка, туганнарына китте. Иртәгә генә кайта. Шулвакыт участковый склад ишеге төбеннән капкага таба сизелер-сизелмәс кенә яткан машина эзенең шәүләсен күрде. Ул болай караганда күренми, иртәнге чыкны әле киптереп бетермәгән кояш яктысында аз гына сизелеп ялтырый иде. – Складыгызга соңгы мәртәбә кайчан машина килде? – Кичә килмәде. – Кемнән шикләнәсез? – Шикләнер беркем дә юк. – Ярар шикләнмәсәгез. Тактаны машина төяп киткән. Складны кемдер ачкан һәм тейлер белән салып җибәргән. Кем ачкан, ничек ачкан? Каян ачкыч алган? Хәзер шушы сорауларга җавап эзләргә кирәк. – Участковый, үзенә үзе мыгырданып, директор янына кереп китте. Наил участковый күренүгә әллә нишләде. Ул аны үзе дә аңлый алмады. Куркуы идеме, әллә инде үкенүеме. Ә участковый белән килгән егетне таныды. Ул Мансур иде. Наил тәмәкесен кабызды да, кабат стена буендагы тарту урынына барып, эскәмиягә утырды һәм аларны күзәтергә кереште. Мансур, участковый Дамирдан нәрсәләр эшләргә кирәгенә күрсәтмә алып, беренче чиратта тирә-якны карап чыгарга уйлады. Ул мәктәптә укыганда ук шундый тикшерү эшләре турында хыялланды. Авыл китапханәсеннән детектив китаплар алып төне буе укый, андагы геройлар белән бергә бутала иде. Ул бер кат склад әйләнәсен карап чыкты. Анда тузанга һәм пычкы чүбенә буялган кычыткан, ак әрем, берән-сәрән кукраеп утырган әрекмәннәрдән кала берни дә күрмәде. Ә менә склад ишеге төбендә тузанга һәм пычкы чүбенә баткан, аз гына сизелерлек машина тәгәрмәче эзе беленеп тора. Димәк, тактаны машинага төягәннәр. Аның үткен күзенә тәгәрмәч эзләре барыбер сизелерлек ялтырый иде. Машина басу юлына чыга һәм, посадкага килеп җиткәч, олы юлга менеп югала. Мансур бу борылышта машинаның килеп туктаган җирен дә күреп алды. Ул олы юлдан төшкән һәм, чүт кенә кырыйга кереп, үләнне таптаган. Аңа кемдер килеп утырган. Әйбәтләбрәк карагач, ул кешенең бу машинаны көтеп торганын аңлады. Чөнки каеннар тирәсендәге үлән тапталган иде. Кем көткән? «Бу эш алдан сөйләшенгән булырга тиеш», – дип уйлады Мансур. Чит кеше кайчан нинди агач кайтасын һәм аның әзер булуын, бүген каравылчының юклыгын белми. Бу тирәдә халык бер-берсе белән таныш. Машина читтән килгән булырга тиеш. Алай булмаса, ул аны көтмәс иде. Һәм төягәч тә, аңа утырып китмичә, үз өенә кайтып киткән булырга тиеш! Мансур яңадан участокка төште. Ул аның эченнән өч мәртәбә әйләнеп чыкты, ләкин бер эз дә күрмәде. Булырга тиеш, ул күрә генә белми. Тагын бер кат әйләнергә кирәк! Озак йөри торгач, аның күзенә койманың бер тактасы кыеграк торганы чалынды. Барып карагач, койманың аскы өлеше кадагыннан купканын күрде. Койма ярыгыннан кемдер кысылып чыккан һәм бераз гына пычкы чүбен кырып калдырган. Аның эченә аз гына җылы керде, һәм ул беленер-беленмәс эз буенча авылга таба төшеп китте. Авылга җитәрәк юлга килеп җиткәч, сукмак югалды. Юл авылның ике башына аерыла иде. Берсе урамга керә, ә икенче башы бакча артларыннан китә. Ул бакча артларыннан үтәргә уйлады. Бакчалар барысы да төрлесе-төрле такталар белән тотылып, һәрберсенең бәләкәй капкалары бар. Кешеләр аны һәрвакыт, вак-төяк мал кермәсен дип, бикле тотарга тырышалар. Мансур, бакча артыннан төшкәндә, берсенең капкасы ябылып бетмәгәнен күрде. Килеп караса, монда иртә таңда кемдер кергән. Аның аяк тузаны сукмакка үскән үләндәге чыкка сөртелеп калган. «Бу – Наилләр бакчасы, нишләп йөрде икән ул чык белән. Сорарга кирәк әле», – дип уйлап куйды Мансур. Фирүзә белән булган хәлдән соң ул Наилне бөтенләй күралмады.