премияләрен югалтачаклар! Кем риза түгел, эштән китәргә гариза языгыз! Барыгызга да аңл...
премияләрен югалтачаклар! Кем риза түгел, эштән китәргә гариза языгыз! Барыгызга да аңлашыламы? Бәлки, мин дөрес әйтмимдер. Башка кеше башкача фикер йөртәдер?! Терлекчеләр йортында тынлык. Директорның шулай йомшак кына әйтеп, каты гына җәза бирүе барысын да шаккатырды. Бу барысына да суд карары булып яңгырады. Кичкә Ризван накладной буенча алган фуражны складка алып кайтып бушатты. Аннан кичке савым вакытында бөтен эшчеләр каршында үзен гафу итүләрен сорады. Шул ук кичне ферма эшчеләре аны, мөдирлектән алып, слесарь итеп калдырдылар. Ә слесарь Хатип абыйны мөдир итеп сайлап куйдылар. Мансур аларның эшенә артык кысылмады. «Бер-берләрен миңа караганда артыграк беләләр, һәм бу вакыйга алар өчен алдагы көннәрендә зур сабак булыр! Ә алга таба эшчеләрнең хезмәт хакын күпме дә булса икътисадка бәйләргә кирәк. Әгәр шулай булса, алар ферма мөдирен урлаудан күптән туктаткан булырлар иде», – дип уйлады ул. Яңгырдан соң бөтен җир, кыш буе җыйган кышкы пычракларыннан арынып, сулыш алып куйды. Үләннәр, кырлардагы уҗым басулары, язгы кар астындагы соры пәрәвез каплавыннан арынып, тагын да яшәреп калдылар. Көздән сукалап куелган көпшәк туфрак, яңгыр суыннан утырып, җылы дымлы һавада пешәргә әзерләнә. Күпьеллык үлән басуларында үләннәр, аермачык рәтләрен күрсәтеп, кояшка таба омтыла. Ә тургай шатлыгыннан бөтен басуларны яңгыратып сайравы белән бер күккә, бер җиргә таба томырыла. Аннан, канатларын җәеп, гүя бөтен җиһанны үзенә җәлеп итәсе килепме, әкрен генә бер урында туктап, йә аска, йә өскә омтыла. Урыны-урыны белән бытбылдык, тартар тавышлары ишетелгәләп куя. Яңгырдан соң ачылган язгы чәчәкләр өстендә бал кортлары безелди. Озакламый җәй киләсен сизгән төрле төстәге күбәләкләр бер чәчәктән икенчесенә сикерешәләр. Ә кырмыскалар нидер эшләгән кыяфәт белән тыз-быз килеп чабышалар. Мансур фермадан соң басуга юнәлде. Яңгыр юеше кипкән һәм иртәгә шушы вакытларга күпьеллык үләннәрне тырмалап туендыруны башларга кирәк, дип уйлады ул, басуның уртасына тикле җәяүләп атлап. Аннан Кашка тауга – арпа чәчеләсе җиргә барды. Җир бөтен басуы белән сорыланып кибеп бетеп бара. Монда да тырма агрегатларын чыгара башларга кирәктер, дип, күңеленә беркетеп куйды. Өенә кайтканда, вакыт соң иде инде. Әсмабикә белән Ильяс йокларга ятканнар. Фирүзә аны көтепме, әллә инде йоклыйсы килмиме, диванда гәҗитләр карап утыра иде. Мансур килеп керүгә, гәҗитен кырыйга куеп, аңа текәлеп калды. – Кайда йөрдең шушы вакыт? Ильяс сине көтеп утырды да, иртә белән сорармын әле дип, йокларга ятты. Белмим нәрсә сорыйсы булгандыр, миңа әйтмәде. Ашарга әзерлимме? Тамагың ачкандыр инде, ашаганда сөйләрсең әле нәрсәләр булганын! – Фирүзә өстәлгә тәлинкәләр куя башлады. – Ашыйсым килми. Мин үзебезнең ашханәдә ашаган идем инде. Талчыктырган, әллә инде җил бәргән. Басуда җиңелчә генә йөргән идем. Без иртәгә тырмага чыгабыз һәм күпьеллыкларны ашлый башлыйбыз. Мансурның, чынлап та, ашарга теләге юк иде. Фирүзәнең табын әзерли башлавы аның ашау теләген бөтенләй бетерде. Күпме еллар хыялында ашкынган кешесе шушы минутларда үзенә карата чиркану уятты. Нәрсә бу?! Ул аны аңламады. Нәзирәнең сөйләгән сүзләрен исбатлап, Фирүзәнең бүген Николайны үбеп алуымы, әллә инде Наилнең җимерелеп барган хуҗалыгы аны чиркандырып алдымы? Ул, үзен кулга алып, берни дә булмаган кебек тотарга тырышты. – Без ул турыда агроном белән сөйләшкән идек инде. Сиңа шалтыраткан идем, ала алмадым. Бик әйбәт, үзең дә шулай уйлагач. Мансур, беренче көнне үк бик оешкан төстә чыгарга тырыш инде! Беренче көнне ничек чыксаң, калган көннәрең дә шуңа охшаш булачак! – Фирүзә Мансурның үзен үгетләгәнне яратмаганын белә торып әйтте бу сүзләрне. «Яратмаса яратмас, әмма мин аңа әйтергә тиеш», – дип уйлады ул, өстәлгә тараткан тәлинкәләрен кабаттан җыеп. Аның күңелендә Мансурга карата нидер уелып куйды. Үпкә идеме, әллә инде ачумы? Ул берсүзсез генә йокларга җыена башлады. – Син, Фирүзә, мине көтмә, йокларга ят! Мин әле әзрәк китап укыйм, нигәдер йокы да килми.